ՀՀ վարչապետի պաշտոնակատար Նիկոլ Փաշինյանը ֆեյսբուքյան իր էջում գրառում է կատարել՝ տեղեկացնելով, որ հուլիսից հետո բանկերն ավելի քան 7 միլիարդ դրամի տույժ-տուգանքներ են ներել:
Գրառումն ամբողջությամբ ներկայացնում ենք ստորև.
«Հուլիսին մեր իրականացրած օրենսդրական փոփոխությունների արդյունքում Հայաստանի բանկերը ավելի քան 7 միլիարդ դրամի տույժ-տուգանքներ են ներել՝ 14 հազար 963 վարկառուի:
Վերանայվել է շուրջ 124 հազար հաճախորդի վարկային պատմություն: Այս գործընթացը շարունակական է:
Անհուսալի վարկեր ունեցող քաղաքացիները պետք է այցելեն իրենց վարկավորած բանկերին՝ տույժ-տուգանքների գծով համաձայնության գալու համար»:
Մեկ այլ գրառմամբ Նիկոլ Փաշինյանը նաև անդրադարձել է հանրապետությունում հանցավորության վիճակագրության մասին երեկ արած իր գրառմանը։
«Երեկ մի փոքր ավելի խորացանք վիճակագրության մեջ եւ պարզվեց, որ Հայաստանում 2018-ի սպանությունների մակարդակը ռեկորդային ցածր է ոչ միայն 1990, այլեւ՝ 1980 թվականից ի վեր»,– գրել է նա:
Հիշեցնենք, որ վարչապետի պաշտոնակատարը երեկ գրել էր, որ 2018 թվականին Հայաստանում արձանագրվել է սպանությունների ռեկորդային ցածր մակարդակ՝ 1990 թվականից ի վեր:
«Սա կարեւոր ցուցանիշ է: Կարեւոր է նաեւ արձանագրել, որ բոլոր նրանք, ովքեր կփորձեն տնտեսական, քաղաքական, անձնային, խմբային որեւէ հարց լուծել բռնության կամ զենքի միջոցով՝ կարժանանան լրջագույն հակահարվածի եւ խստագույն պատասխանատվության»,– գրել էր նա:
