ԱԱԾ տնօրեն Արթուր Վանեցյանն այսօր լրագրողների հետ զրույցում անդրադարձավ նախկին վարչապետ Հովիկ Աբրահամյանի տարածքում հայտնաբերված զենքերին։ Հարցին, թե փաստորեն ԱԱԾ-ն շտապե՞լ էր եզրակացնել, թե այդ զենքերը կապ ունեն Մարտի մեկի հետ, Վանեցյանը պատասխանեց, որ ինքը այն ժամանակ էլ էր խուսափում հստակ հայտարարություններ անել։
Ըստ Վանեցյանի` տեղեկություններ էին ստացվել, որ Աբրահամյանի ընտանիքին պատկանող տարածքում մեծ քանակությամբ զենք կա, որը հնարավոր է` առնչությունի ունի Մարտի մեկի հետ։
“Այդ օրերին, դուք հիշում եք, անընդհատ տարբեր հարցեր էիք տալիս և ուզում էիք անպայման, որ իմ բերանից դուրս գար մի խոսք, որով պետք է մեղադրեի այս կամ այն անձին այդ զենքերի` Մարտի մեկին օգտագործման մեջ։ Ես ասել եմ, որ կա զենք, որը հնարավոր է` օգտագործվել է։ Իրականացվել է փորձաքննություն, և ՀՔԾ պետն ասաց, որ այդ զենքերն առնրություն չունեն Մարտի մեկի հետ”, ասաց Վանեցյանը։
Նա հավելեց, որ կարևորը արդար քննություն է իրականացվել։ Նա ասաց, որ երբեք չեն ազդել փորձաքննության մարմինների վրա` իրենց համար ցանկալի արդյունք ստանալու համար։
