Ճանապարհային ոստիկանների ստացած աշխատավարձն ամենաբարձրն է ոստիկանության համակարգում: ՀՀ ոստիկանության պետին կից հասարակական խորհրդի հերթական նիստում այս մասին ասաց ոստիկանապետ Վալերի Օսիպյանը՝ անդրադառնալով խորհրդի անդամներից մեկի՝ կոռուպցիոն ռիսկերը կանխելու նպատակով ՃՈ աշխատավարձը բարձրացնելու դիտարկմանը:
«Աշխատավարձերի բարձրացման հարցը շատ կարևոր է: Իհարկե, դա կկանխարգելի կոռուպցիոն դրսևորումները։ Սակայն այն աշխատավարձը, որը ստանում է ՃՈ-ն, ոստիկանության ամենաբարձր աշխատավարձն է: Այդ դեպքում պարեկային ծառայողներն ինչ անեն, երբ մահակը կողքներին կախած փողոցներում գնում-գալիս են: Ճանապարհային ոստիկաններն ամենաարտոնյալ ծառայողներն են մեր համակարգում»,-վստահեցրեց Օսիպյանը:
Նա նշեց, որ մարտական հերթապահության մեկնած ոստիկանության զորքերը 110 000 դրամ աշխատավարձ են ստանում: Ոստիկանապետը նկատեց, որ նրանք այս եղանակին 14 օր կանգնում են մարտական դիրքում: Այնինչ, ՃՈ ոստիկանների նվազագույն աշխատավարձը սկսում է 250 000 դրամից: «Համեմատական առումով դա շատ բարձր է: Ոստիկանները մեքենաների մեջ են ցանկացած եղանակի»,-ասաց Օսիպյանն ու նկատեց, որ ճանապարհային ոստիկանի՝ որևէ հարցի մեջ ընդգրկվածությունը քիչ է՝ համեմատած մյուս ծառայողների:
Նա նշեց, քննիչը վտանգում է իր կյանքը, առողջությունը, կարգավորված չէ նրա օրակարգը, լիազորությունները, և ստանում է ընդամենը 150 հազար դրամ աշխատավարձ: Նույնը համայնքային ոստիկանի դեպքում է: Օսիպյանը շեշտեց՝ ինքը դեմ չէ, որ ՃՈ աշխատավարձը բարձրանա, սակայն այս իրավիճակում համեմատական կարգով իրենք ապահովված են, քան մյուս աշխատողները: Սակայն բարձրացումն, իհարկե, կարևոր է: Նա նկատեց՝ ակտերից գոյացած գումարներից ՃՈ աշխատավարձի բարձրացման նպատակը ևս եղել է կոռուպցիոն դրսևորումների կանխարգելումը:
