Ինչպես արդեն տեղեկացրել ենք, «Իմ Քայլը» դաշինքի նախընտրական քարոզարշավն ու հանրահավաքն այսօր Մալաթիա-Սեբաստիա համայնքում է:
Դաշինքի թեկնածու Հայկ Մարությանի ելույթից հետո ՀՀ վարչապետ Նիկոլ Փաշինյանը որոշ պարզաբանումներ ներկայացրեց վերջին օրերին քաղաքական մյուս ուժերի արտահայտած մտքերի ու հայտարարությունների հետ կապված:
Խոսեց նաեւ սեւերի ու սպիտակների բաժանման հայտնի արտահայտության շուրջ աղմուկի մասին:
Այնուհետ անդրադարձավ Հայաստանում արտոնյալների գոյությանը, հեղափոխությանը հաջորդած ամիսներին: Վերջում՝ խոսեց ժողովրդի քվեարկության ու կիրակի օրվա ընտրությունների կարեւորության մասին.
«Բոլոր հարցերի պատասխանները դուք պետք է տաք, դուք եք որոշելու, թե ինչ կլինի հետո, ձեզնից ամեն մեկի մեկ ձայնը ունի պատմական ու շրջադարձային նշանակություն: Ես իմ ամբողջ քաղաքական կյանքը ծախսել եմ նրա վրա, որ մարդկանց ապացուցեմ, որ ամեն մեկի ձայնից ավելի արժեքավոր բան չկա: 10 տարի Հյաստանի շատ քիչ մարդիկ են հավատացել, որ դա այդպես է: Հեղափոխությունն ինչի՞ց եղավ, երբ ամեն մարդ հասկացավ, որ իրենից է կախված որոշումը, կաթնատու մայրերը իրենց երեխեքին մանկասայլակների մեջ դրած զգում էին, գիտեին, որ իրենք են Հայաստանում բան որոշում, գողն ու գողցողը ո՞վ են, որ բան որոշեն: Մեր երկրում հարց է որոշել այն դեռատի մայրը, որն իր երեխային դրել է մանկասայլակի մեջ ու ճանապարհ է փակել, ինքն է ամենհզոր ուժը էս երկրում: եվ ով էս ուժը չի ճանաչում, վաղն ասելու է՝ ես սխալվեցի:
Արտահերթ խորհրդարանական ընտրությունների մասին որոշումն էլ ես չեմ կայացրել, այլ ժողովուրդը: Բոլոր էն ուժերը, ովքեր ասում են՝ մենք կարող է դեմ քվեարկենք խորհրդարանական ընտրություններում, իրենք ուրեմն դեմ են ժողովրդին ու պետք է ընդհանրապես ձայն չհավաքեն, բայց դա դուք պետք է որոշեք:
